小丸子的筆記本

其實這些是小餐包，但擠在一起的情形像煞了嘉頓衛星包，所以我替它改了名字！

麵包很鬆軟，全麥麵粉中加入了亞麻籽，吃起來口感豐富，是很有水準的麵包！

很久沒有上載馬騮麵包了。其實馬騮師傅經常烘烤麵包，但水準飄忽(故意把字體縮至最小，以為沒有人看見)……這次就上載馬騮師傅最近的佳作。

上圖這個名為無花果核桃山形黑麥方包。

造型巨大，但口感很鬆軟，且用料豐富，與專業麵包店相比簡直是有過之無不及！而且全手工製作，用料天然、健康，非常有水準！

再來一張近拍。一半是合桃無花果，另一邊是合桃提子。

繼之前的「大作」後，嘗試了多款不同的麵包，包括我非常喜歡的意大利軟包，朱古力雙色包，蕃茄乾Focaccia，全麵山形包（無錯，又是它），還有在媽媽生日當天整的「壽桃包」，馬騮決心努力鑽研，要做出完美的麵包！哈‧‧‧哈‧‧‧哈‧‧‧

全麵山形包 (4月22日及28日)

 今次嘗試的是西式麵包最基本製作：法包。

原味法包 (5月25日)

由搓麵糰到整形一直都非常順利，整形做得還不錯呢，不過，棋差一著‧‧‧整形後已經差不多12時，是凌晨12時，馬騮已經好好好眼瞓，但是最後發酵可能還需要多2-3小時，而且使用的是全天然酵母，發酵時間較乾酵母長，時間較難預算。別無他法，馬騮決定俾啲法包發過夜，明早晨早起來焗吧。

2010年4月10日

之前整的「牛奶小餐包」雖然都幾成功，不過唔係太受歡迎，皆因麵糰加咗牛油，「酥」味重咗少少，再加上面頭的芝麻有少少油益味，可能擺得太耐‧‧‧今日學完車返到屋企再接再勵，整「全麵山形包」。

最近，馬騮做咗「阿茂」，鐘意焗麵包，一得閒就鑽研屋企的食譜。繼成功培植了「提子天然酵母」後，嘗試咗幾款麵包，包括饅頭，全麥包，意大利香草軟包等等。不過，除了饅頭和幫小丸子姐姐搓麵糰、之後交由姐姐焗的意大利香草軟包外，其餘都係失敗，焗完的麵包完全發揮咗香港人的精神--好堅強。不過，馬騮冇放棄，累敗累試，不斷上網搜尋麵包食譜，睇睇啲麵包達人整包的心得。睇咗好幾個Blog後，決定試試Amigo的「最愛麵糰配方大公開」 (http://www.wretch.cc/blog/luckyest/2380173)，因為貪佢份量唔多，就算失敗咗，都唔駛要自己啃晒咁多包‧‧‧雖然話跟足個食譜，不過都係有啲「偷工減料」，糖和牛油的分量減半。

放入所有材料後，就要開始搓麵糰。開始時麵糰好濕，好黏手，真係冇辦法搓，唯有用撻，左手努力把麵糰好似滾球咁滾起，然後大力咁撻落個盆內，將啲空氣包係個麵糰內，手勢好似打魚旦咁。一路係咁撻，足足撻咗起碼15分鐘，個麵糰才唔會捻手，兼表面滑溜，整個過程全部人手操作，撻完隻手真係好攰，做麵包師傅真係唔容易呀，有血有汗呀‧‧‧應該冇血，係得汗水啫。